Es tiempo de frutikas
- Daniel Santacruz
- 2 days ago
- 1 min read
(Palavras i melodía por Miriam Sherman)
Es tiempo de frutikas i estamos fiestando
kon plazer komemos, dezimos berahá.
Al Dió dezimos grasias por kada frutika
i diferentes vinos tenemos de gostar.
Los kampos vedres enfloresen
munchas, munchas flores kresen
Todo, todo en la natura
le da grasias al Dió.
Kantikas para Tu Bishvat inspiradas por kantikas israelianas
(palavras por Miriam Sherman)
__________________________________________________________________________________
Siklamén
Debasho la piedra, un milagro krese
un siklamén luzio en verdad.
El sol kon su briyo, lo beza, lo enbuelve,
lo enbuelve kon su klaredad.
Siklamén, siklamén, el pasharó kanta,
echa una mirada asia mí.
Ma el siklamén tan ermozo, se espanta,
se eskonde i no kere salir.
Una ijika sale a pasear por los kampos
en un día yeno de sol.
Kada flor i planta las toma en sus manos,
i kere también esta flor.
Ama en pensando, deside desharla,
ke otros la puedan mirar …
Los pasharós kantan para enkorajarla
i ansí esta kantika eskapar.
__________________________________________________________________________________
El arvolé enflorese
El arvolé enflorese
el sol, de oro parese,
pasharikos kantan ya
porke oy es Tu Bishvat.
Berahá de frutas
oy kale fiestar.
Todas las frutikas
vamos a gustar.
___________________________________
February 1, 2026
Febrero 1, 2026
Comments